Outra vez saímos do centro de Muros pero nesta ocasión imos
cara o interior. É unha rota doada que percorre os montes do concello de Muros
e Carnota, o único problema é que só están en uso as pistas forestais, xa que
todos os camiños están abandonados e polo tanto imposibles de transitar nesta
época do ano, están cheos de xestas e de toxos. As vistas son impresionantes,
podemos ver todo o percorrido da rota anterior pero a “vista de paxaro”. Cruzámonos
con varias zonas de petroglifos, pero como non están sinalizados resulta difícil
atopalos. O que si atopamos son restos de antigos muíños, incluso algún reconstruído.
Á volta pasamos polo alto das Forcadas (472 m.) (facilmente recoñecible porque
é onde están todas as antenas de comunicacións) dende onde podemos contemplar
toda a costa dende Muros a Carnota pasando polo Monte Louros, a ría, etc. (Yeyi)